- على بابك بدأت أحلم
- وبابك للعباد مفتوح
- على بابك رميت أحمالى
- واتوضيت وكلى طموح
- وصلّيت جنب عشاقك
- وسلّمت الجسد والروح
- على بابك
- على بابك بدأت أشتاق
- على بابك قصدت الضىّ
- بقيت من زمرة العشاق
- وحسّيت إنى كائن حىّ
- على بابك
على بابك
ضعيف وجناحى متعافى
وشايل حمل كل الناس على كتافى
وقلبى بيبتسم بشويش
ودمعى بينفرط صافى
يا أعظم اسم فى الملكوت
يا عادل فى الحياة والموت
يا واهب نفسى حسّ وصوت
ضعيف باتحامى بالجبروت
ذليل بيعزنى الرحموت
عليل باتداوى بالشافى
وحافى يا رب فى رحابك .... على بابك
على بابك
دعيت بالصبر
دعيت بالستر فى الدنيا
وطلبت محبّتك فى القبر
على بابك
يا باب واسع
وغيرك بابه شبر ف شبر
دعيت بالعزّه والرحمه
ودعيت بالعطف فى الزحمه
وبكيت وسط التراب والتبر
على بابك
على بابك
بأكون عصفور
باكون كلمه ف طبق بنور
باكون طاقه وقصيدة نور
باكون ضحكه ف عيون الحور
باكون أرض ووطن وبحور
باكون عشّ وشجر وطيور
باكون فرحه ف زوايا الدور
تدور على وشّ أحبابك
على بابك